Akademiyalıq licey 2000-jılda Ózbekstan Respublikası Joqarı hám orta arnawlı bilimlendiriw ministrligi Orta arnawlı, kásiplik bilimlendiriw orayınıń 2000-jıl 13-mart kúngi 43-sanlı buyrıǵı tiykarında shólkemlestirilgen hám oǵan “Nókis mámleketlik pedagogika institutı qasındaǵı 1-sanlı Nókis akademiyalıq liceyi” atı berilgen. Sol dáwirde akademiyalıq liceyde oqıw processi 3 jıl etip belgilengen. Ózbekstan Respublikası Prezidentiniń 2017-jıl 26-sentyabrdegi “Joqarı oqıw orınlarına kiriw ushın talabanlardı maqsetli tayarlaw sistemasın jánede rawajlandırıw haqqında”ǵı PQ-3290-sanlı qararı hámde 2017-jıl 14-mart kúngi “Orta arnawlı, kásiplik bilimlendiriw mákemeleri jumısın jánede jetilistiriw is-ilájlari haqqında”ǵı PQ-2829-sanlı qararına tiykar Nókis mámleketlik pedagogikalıq institutı akademiyalıq liceyi ataması beriledi hám de akademiyalıq liceyde oqıw múddeti 3 jıldan 2 jılǵa túsiriledi.

Akademiyalıq licey Nókis qalası P.Seytov kóshesi boyında jaylasqan bolıp, licey imaratı 1995-jılı qurılǵan. Oqıw imaratında 33 pán oqıw xanası, 3 kompyuter, 4 lingafon, 6 laboratoriya xanaları, 2 sport zal, kitapxana hám 200 orınlı asxana bar. Akademiyalıq licey quwatlılıǵı 825 orınǵa mólsherlengen. 2008-jılı jańa tiptegi 300 orınǵa mólsherlengen oqıwshılar turar jayı imaratı qurılısı juwmaqlanıp paydalanıwǵa tapsırıldı.

Búgingi kunde akademiyalıq liceyde jámi 61 pedagog oqıtıwshılar jumıs alıp barmaqta. Olardan 3 ilim kandidatı, 28 bas oqıtıwshı, 5 jetekshi oqıtıwshı, 16 úlken oqıtıwshı hám 9 joqarı maǵlıwmatlı oqıtıwshılar bilim berip kelmekte. Ilimiy dáreje hám kategoriyalarǵa iye oqıtıwshılar úlesi 85,2% dı quraydı.

Akademiyalıq liceyge ulıwma bilim beriw mektepleri 9-klass pitkeriwshileri qamtılıp, olar ózleri tańlaǵan “Anıq pánler”, “Tábiyiy pánler”, “Social-gumanitar pánler” hám “Shet tilleri” baǵdarları boyınsha tálim alıp, joqarı oqıw orınları bakalavriat tálim baǵdarlarında oqıwların dawam etedi.

Akademiyalıq licey pitkeriwshileriniń joqarı oqıw orınlarına kiriw kórsetkishleri reytingi respublikada aldaǵı orınlardı iyelep kelmekte. Bugingi kúnge shekem akademiyalıq liceydi 5612 oqıwshı pitkergen bolsa, olardan 95 payızdan aslamı joqarı oqıw orınlarında oqıwların dawam etti.

Pitkeriwshilerdiń bunday joqarı kórsetkishlerge erisiwi akademiyalıq licey pedagog-oqıtıwshıları miynetleriniń nátiyjesi dep qarawımız tiyis. Akademiyalıq liceyde oqıwshı jaslarǵa mámleketlik bilimlendiriw standartlarına say bilim beriwde, pánlerden ózlestiriw dárejesiniń artıwında ózleriniń girewli ornına iye bolǵan, oqıw processinde jankúyerlik penen xızmet kórsetip kiyatırǵan fizika páni oqıtıwshısı “Ózbekstan xalıq múǵállimi” Jaliy Jumabekov, biologiya páni oqıtıwshısı «Shuxrat» medalı iyesi Parshagúl Kamalovalardı atap ótiw orınlı. Sonıń menen birge 9 oqıtıwshı “Qaraqalpaqstan bilimlendirw aǵlası”, 1 oqıtıwshı Ózbekstan Respublikası «Orta arnawlı kásiplik bilimlendiriw aǵlası» kókirek nıshanları menen sıylıqlandı.

Akademiyalıq liceyge kóp jıllardan berli basshılıq etip kiyatırǵan Qalxorazov Qutlimurat Utepbergenovich jaslarǵa tálim-tárbiya beriw menen bir qatarda ilimiy-izertlew jumısların da alıp barmaqta. Onıń 3 ilimiy maqala hám 2 metodikalıq qóllanbaları Respublikamızda baspadan shıǵarılatuǵın ilimiy jurnallarda daǵaza etildi. Ol turaqlı túrde óz mamanlıǵın, siyasiy, ekonomikalıq hám ilimiy-teoriyalıq dún`yaǵa kóz qarasın asırıw boyınsha qatańlıq hám juwapkershilik penen isleydi. Tinbay izleniwleri nátiyjesi hám miynet iskerligi esapqa alınıp, 2006-jılı xalıq aralıq “Antigue World” ilimiy akademiyası tárepinen docentlik dárejesi berildi. Bilimlendiriw tarawıdaǵı kóp jıllıq nátiyjeli miynetleri ushın «Qarqalpaqstan Respublikası xalıq bilimlendiriw aǵlası», 2002-jılı Qaraqalpaqstan Respublikası Joqarı Keńesi “Húrmet jarlıǵı” hám 2012- jılı «Ózbekstan Respublikası orta arnawlı, kásiplik bilimlendiriw aǵlası» kókirek nıshanı menen sıylıqlandı.

Usınıń menen bir qatarda akademiyalıq licey pedagog-oqıtıwshıları arasınan da ilim izertlew jumısları menen shuǵıllanıp tariyx páni boyınsha Bahadır Bekimbetov, Larisa Orazova hám qaraqalpaq tili páninen Bekmurza Dilanovlar ilimiy jumısların tabıslı qorǵap ilim kandidatı dárejelerin aldı.

Akademiyalıq liceydiń bir neshe oqıtıwshıları shet ellerde óz bilimlerin asırıp keldi. Olardan inglis tili páni oqıtıwshı A.Sadirova Yaponiya mámleketinde, T.Ernazarov Qubla Koreya mámleketinde, tariyx páni oqıtıwshı B.Bekimbetov, inglis tili páni oqıtıwshısı U.Sabirovlar Hindistan mámleketiniń Nyu-Dehli qalasında tájriybelerin asırıp keldi.

2014-2015 oqıw jılında orta arnawlı, kásip-óner bilimlendiriw mákemelerindegi dógerek basshıları arasında ótkeriletuǵın «Eń úlgili dógerek basshısı» tańlawında akademiyalıq liceydiń inglis tili páni boyınsha dógerek basshısı Gulmira Tajimbetova qatnasıp «Eń bilimdan dógerek basshısı» nominaciyası jeńimpazı bolıwǵa miyassar boldı.

Akademiyalıq liceyde pedagog-oqıtıwshılardıń jańa innovaciyalıq hám pedagogikalıq texnologiyalardan paydalanıp ashıq sabaqlar shólkemlestiriw jolǵa qoyılǵan. 2014 jıl aprel ayında Nawayı wálayatı Nawayı qalasında «Akademiyalıq liceylerde oqıw, tálim-tárbiya procesin jańa basqıshqa kóteriw hám de jetilistiriwde oqıtıwshılardıń bilim dárejesin hám pedagogikalıq sheberligin asırıw» temasında ótkerilgen seminar treningke licey direktorı Qutlımurat Qalxorazov hám matematika páni oqıtıwshı Quwanıshbay Qosuakov qatnasıp, «Geometriya sabaǵında Keys-stadi metodın qollanıw» temasındaǵı metodikalıq bayanatı menen qatnasıp sıylı 3-dárejeli diplom menen sıylıqlandı. Usı seminar 2014-jıl 25-aprelde akademiyalıq liceyde shólkemlestirilip, oǵan Qaraqalpaqstan Respublikasındaǵı barlıq akademiyalıq licey direktor orınbasarları hám tájiriybeli oqıtıwshılar qatnastı. Seminarda 8 ulıwma bilim beriw pánleri boyınsha ashıq úlgili sabaqlar analiz etildi hám metodikalıq bayanatlar, prezentaciyalar ótkerildi. Olardan eń úlgili dep tabılǵan sabaqlar respublika kóleminde keń en jaydırıwǵa usınıs etildi.

Akademiyalıq liceydiń «Kamalot» jaslar jámiyetlik háreketi baslanǵısh shólkemi jetekshisi A.Kurbaniyazova Tashkent qalasında ótkerilgen «Usınıs hám baslamalar» kórik tańlawında belsendi qatnasıp diplom menen sıylıqlanǵan bolsa, 2014 hám 2015 jılları ruwxıylıq hám aǵartıwshılıq jumısları boyınsha direktor orınbasarı G.Masharipova Ózbekstan Respublikası orta arnawlı kásiplik bilimlendiriw shólkemleri arasında ótkerilgen «Jıldıń eń belsendi manawiyat úgit-nasiyatlawshısı» kórik tańlawında sıylıqlı II-orınlardı iyeledi.

Akademiyalıq liceyde uqıplı hám intalı oqıwshılar menen islew hám olardı qollap-quwatlaw nátiyjesinde, liceyimiz pitkeriwshilerinen A.Shuprakov fizika páni boyınsha Polshada ótkerilgen xalıq aralıq olimpiadada qatnasıp, «Nobel` sıylıǵına dáslepki qádem» diplomı menen sıylıqlanǵan bolsa, M.Nasirov Singapur qalasında ótkerilgen xalıq aralıq fizika olimpiadasında qatnasıp, joqarı kórsetkishlerge eristi. Bunnan tısqarı oqıwshılarımız AKSELS shólkeminde ótkerilgen tańlawda jeńimpaz bolıp, oqıwshılarımızdan A.Reymbaev, D.Uzaqbaev, Z.Xojaniyazov, N.Nurmanova, M.Xojametovalar Amerika Qurama shtatlarında oqıp keldi.

Akademiyalıq licey oqıwshıları Respublika kóleminde ótkeriletuǵın pánler olimpiadasında joqarı kórsetkishlerge erisip kelmekte. Respublika pánler olimpiadasında ulıwma bilim beriw pánlerinen 87 oqıwshı IV basqısh Ózbekstan Respublikası kólemindegi pánler olimpiadasında belsendi qatnasıp 11 oqıwshı sıylı orınlardı iyelep joqarı oqıw orınlarına imtiyazlı túrde oqıwǵa qabıl etildi.

Bunnan tısqarı, licey oqıwshıları «Bárkámal áwlad» sport oyınlarına hám basqa jarıslarǵa úzliksiz qatnasıp atır. Akademiyalıq liceydiń 2004-jıl pitkeriwshisi Alisher Yakupbaev «Erkin gúres» boyınsha Ózbekstan chempionı bolıp, Nókis Mámleket pedagogikalıq institutınıń dene tárbiyası fakultetine imtixansız qabıllandı, 2013-jıl pitkeriwshisi Jumabaeva Parida «Dzyudo» gúres boyınsha Ózbekstan chempionı bolıp, Qaraqalpaq Mámleketlik universiteti dene tárbiyası fakultetine imtixansız qabıllandı. 2010-2014 jıllarda licey oqıwshıları sport jarıslarına qatnasıp, olardan 2 oqıwshı Aziya chempionı, 6 oqıwshı xalıq aralıq turnir jeńimpazı, 8 oqıwshı Ózbekstan Respublikası chempionı hám 24 oqıwshı Qaraqalpaqstan Respublikası chempionı bolıwǵa miyassar boldı.

Ózbekstan Respublikası kóleminde ótkerilgen ”Keleshek hawazı” kórik tańlawında Nurjanova Hurliman «Kórkem dóretiwshilik» nominaciyası boyınsha, «Salıq bilimleri balalarǵa» kórik tańlawında Atamuratov Nursultan, 2011-2012-jıllar Sadikov Allayar «Kompyuter prezentaciyası» nominaciyasi boyınsha, «Konstitutsiya-baxıtımız tayanıshı» kórik tańlawınıń jeńimpazı dep tabılıp sıylı orınlardı iyeledi.

Akademiyalıq liceydiń «Ádalat» komandası «Siz nızamdı bilesizbe? » kórik tańlawınıń 2010 jılda Ózbekstan Respublikası kóleminde ótkerilgen basqıshında sıylı 3-orındı, al 2012 jılda sıylı 1-orındı iyeledi.

2014-jıl Tashkent qalasında sporttıń qılıshpazlıq túri boyınsha «Úmit bayraqları» Ózbekstan Respublikası ashıq turnirinde akademiyalıq licey oqıwshısı Múqaddes Abdimuratova sıylıqlı III orındı iyelep, diplom menen sıylıqlandı.

Akademiyalıq licey hám kásip-óner kolledjleri oqıwshı jasları arasında ótkerilgen «Jaz-2014» sport jarıslarında Juzbaeva Shiyrin sporttıń Taekwon-Do túri boyınsha 1-orındı, Reymbaeva Aqsingul sporttıń Shaxmat túri boyınsha 3-orındı, Tilewbergenov Nawrız stol tennisi boyınsha 3-orındı, Názerbaev Nurdawlet sporttıń Taekwon-Do túri boyınsha 2-orındı iyeledi.

Akademiyalıq licey oqıwshısı Názerbaev Nurdawlet 2014-jıl Kazaxstan Respublikası Astana qalasında ótkerilgen ashıq birinshiliginde sporttıń Taekwon-do (ITF) túri boyınsha sıylıqlı III orındı iyeledi.

2021-jılı sporttıń qılıshpazlıq túri boyınsha liceydiń 2-kurs oqıwshısı Perdebaeva Gulistan Ózbekstan Respublikası qurama komandası esabınan jáhan kubogın hám jeke tártipte Aziya chempionlıǵın qolǵa kiritti.

Ózbekstan Respublikası Prezidentiniń 2020-jıl 3-dekabrdegi “Intalı jaslardı tańlap alıw sisteması hám akademiyalıq liceyler iskerligin jetilistiriw is-ilajları haqqında”ǵı PQ-4910-sanlı qararı qabıl etildi. Usı qarar tiykarında Nókis mámleketlik pedagogikalıq institutı tárepinen “Jol kartası” islep shıǵıldı.

Usı qarar tiykarında mámleketlik byudjet esabınan hár semestr juwmaǵı boyınsha pánlerdi ayrıqsha bahalarǵa ózlestirgen eń úlgili oqıwshılarǵa “Licey maqtanıshı” stipendiyası engizildi.

Usınıń menen bir qatarda 2021-jıl oqıw processinde joqarı kórsetkishlerge erisken eń úlgigi dep tabılǵan 13 oqıwshıǵa Nókis mámleketlik pedagogikalıq institutı rektorı tárepinen “Institut stipendiyası” berildi.

Akademiyalıq licey jámáátiniń bilimlendiriw tarawındaǵı kóp jıllıq miynetleri, erisken joqarı nátiyjeleri itibarǵa alınıp Qaraqalpaqstan Respublikası Ministrler Keńesiniń orta arnawlı, kásiplik bilimlendiriw Basqarması tárepinen 2014-2015, 2015-2016, 2016-2017-jılları Nókis mámleketlik pedagogikalıq institutı akademiyalıq liceyi «Eń úlgili akademiyalıq licey» dep tabıldı, húrmet jarlıǵı hám qımbat bahalı sawǵalar menen sıylıqlandı.

Akademiyalıq licey jámááti mámleketlik bilimlendiriw standartları búgingi kún talabına say oqıwshı jaslarǵa bilim beriwdi eń joqarı maqset etip belgiledi. Bul maqsetke erisiwde ilim, pán hám texnika jańalıqlarınan nátiyjeli paydalanıp, oqıw hám tárbiya jumısların alıp barmaqta.