Ájiniyaz atındaǵı Nókis mámleketlik pedagogika instituti (NMPI) akademiyalıq liceyinde oqıwshılardıń bos waqıtların mazmunlı ótkiziw, olardıń pánler boyınsha bilimlerin tereńlestiriw hám qábiletlerin rawajlandırıw maqsetinde hár qıylı pán dógerekleri shólkemlestirilgen.

Dógerek jumısları bir ayda tórt márte ótkeriledi.. Bul waqıt aralıǵında dógerek aǵzaları temalarǵa jaqsı tayarlanıp keledi. Dógerek jumısların kúndelik sabaqlar ótkeriletuǵın toparda emes, liceydegi laboratoriya xanalarında, oqıwshılardı qızıqtıratuǵın dárejede bezelgen, jaqsı hám taza bólmelerde ótkergen maqul. Dógerek aǵzaların qızıqtıratuǵın, olardıń háreketsheńligin asıratuǵın máselelerdiń biri – jumıs jobasınıń tematikası mazmunlı hám tásirli bolıwı kerek. Jumıstıń mazmunı tańlanǵan temalardıń tárbiyalıq áhmiyetine hám kórkemligine baylanıslı boladı. Jumıstıń tematikalıq jobası licey oqıwshılarına arnalıp dúzilgen epikalıq hám lirikalıq dógerek jumısınıń jobasına tiykarlanıp dúziledi. Qaysı dógerek jumısınıń tematikası bolmasın, bári de bir jılǵa mólsherlep dúziledi. Solay etip, usı jobada dógerek aǵzalarınıń maqsetleri hám pikirleri esapqa alınǵanı maqul. Ádette, bunday akademiyalıq liceylerde dógerekler tiykarınan tómendegi baǵdarlarda alıp barıladı.

Pán dógerekleri: Anıq hám tábiyiy pánler (matematika, fizika, ximiya, biologiya), sonıń menen birge gumanitar pánler (ana tili hám ádebiyatı, shet tilleri, tarix)boyınsha oqıwshılardı olimpiadalarǵa hám oqıw oraylarına tayarlaw dógerekleri.

Informatika hám axborot texnologiyaları páninen “Jas programmist”,  fizika páninen “Jas fizikler”, biologiya páninen  “Keleshek biologları”,  inglis tilinen “Never stop learning”, ximiya páninen  “Bioximiya”, nemis tili páninen  “Wir lernen Deutsch”, tariyx páninen “Tariyx-millet esteligi”, ózbek tili páninen  “Adabiyotshunos”, qaraqalpaq tili hám ádebiyatı páninen “Sóz marjanı”, “Ziban”, matematika páninen “Jas matematik”, geografiya páninen “Jer júzin úyrenemiz” hám russ tili páninen “Put g slovu” dógerekleri shólkemlestirilgen.

Sport dógerekleri: Oqıwshılardıń den-sawlıqların bekkemlew hám sport penen shuǵıllanıwı ushın futbol, basketbol, voleybol hám stol tennisinen sport túrleri dógerekleri shólkemlestirilgen.